Atvinnumál
Fjarðabyggð hefur í gegnum tíðina búið vel að því öfluga atvinnulífi sem hér er og eru fyrirtæki í Fjarðabyggð með þeim stærstu og öflugustu hérlendis á sviði sjávarútvegs og álframleiðslu. Því viljum við halda áfram í uppbyggingu í höfnum sveitarfélagsins í takt við þróun sjávarútvegsins þannig að hann geti eflst og dafnað í takt við umsvip sín í sjávarútvegi og fiskeldi. Þar liggur að miklu leyti fjöregg samfélagsins okkar og með sanni er hægt að segja að Fjarðabyggð sé miðstöð sjávarútvegs á Íslandi. Þeirri stöðu ætlum við að halda og efla áfram.
Framsókn í Fjarðabyggð mun leggja höfuðáherslu á áframhaldandi þróun og uppbyggingu Græns orkugarðs og grænar fjárfestingar í atvinnuuppbyggingu í sveitarfélaginu. Við viljum að Fjarðabyggð verði leiðandi samfélag þegar kemur að framleiðslu á orku til orkuskipta.
Glæsileg uppbygging á Múlanum á Norðfirði hefur sýnt hversu mikil lyftistöng slík aðstaða er fyrir eflingu starfa án staðsetningar á landsbyggðinni. Leita þarf allra leiða til að efla slíka uppbyggingu sem víðast í hverfum Fjarðabyggðar. Þá er mikilvægt að tryggt verði að farið verði í ljósleiðaravæðingu þéttbýlis í Fjarðabyggð sem fyrst. Eigi störf án staðsetningar að vera raunverulegur valkostur þarf að tryggja að lagningu ljósleiðara ljúki sem fyrst í öllum byggðakjörnum.
Höfuðáhersla verður á þróun og uppbyggingu Græns orkugarðs og grænar fjárfestingar
Hvetja til uppbyggingar klasa og samvinnuhúsa í hverfum sveitarfélagsins
Leggja áherslu á nýsköpun og eflingu lítilla og meðalstórra fyrirtækja
Gera átak í ljósleiðaravæðingu sveitarfélagsins sem er lykilatriði fyrir störf án staðsetningar
Tryggja að Fjarðabyggð haldi stöðu sinni sem miðstöð sjávarútvegs á Íslandi
Halda áfram að fjárfesta í uppbyggingu í höfnum Fjarðabyggðar í samráði við þróun sjávarútvegs
Ýta undir nýliðun í landbúnaði
Efla þjónustu og samstarf milli bænda og sveitarfélagsins, íbúa og fyrirtækja
Horfa til þess hvernig hægt er að auka framleiðslu og ræktun og ýta undir nýsköpun
Ýta undir að matarmörkuðum verði komið á laggirnar og íbúum gefist kostur á að versla beint við matvælaframleiðendur